第二日一早就去左浮潛，我地跟尼莫浮潛，近東清嗰邊，NTD600一個人，我地約左十點開始，所有用具都係佢準備好，去到換衫，之後就去左東清貝殼砂灘，有哂救生衣，教練會帶住我地出去，如果第一次或者怕水嘅人都可以全程攬住水泡，又唔怕走失，蘭嶼嘅海，真係好藍，我地問教練今日算唔算好清，佢話都未算最清嘅時候，對我黎講夠哂清啦，個海仲好藍，都睇到唔少魚，特別係好多小丑魚，小魚比較多，都有一群群嘅魚仔。我覺得如果自己有裝備，可以自己黎潛，當然要有經驗先得啦。成個體驗由換好衫10點半開始，差唔多12點回程，潛左個幾兩個鐘，都夠哂皮，因為都幾攰，兩個鐘剛剛好！
*所有相都係無filter同調色！*
換好衫，要揸一小段路，有個涼亭，然後行落海邊
海水好藍，水有3-5米深，對我黎講睇落都好深啊，一開始攬住水泡一齊出去，之後習慣左就唔怕啦，放飛自我，喺大家附近游黎游去
ONONTHEROAD 