第二日我地一早去左浮潛，之後沖完涼就出去食野環島，環島一圈35公里，揸車都要個半鐘，睇到景點落車睇下都要兩三個鐘，因為我地揸8人車，所以無行中橫公路，如要想去大小天池或者燈塔，就要行路或者揸機車。嗰日我地差唔多10點先去浮潛，潛完揸車返去都12點幾，搞得黎都就黎兩點，好多餐廳都無開啦，咁岩搵到藍與羊拉麵，無野食黎講，算過得去啦，之後就出發。我地因為第一日向東走，今次我地就向西走，睇下新野。
虎頭坡看饅頭岩
我地由紅頭部落出發，揸十分鐘左右就可以去到虎頭坡，嗰度有一個觀景台，都可以望到日落，有時仲有好多羊，仲可以睇到饅頭山
紅頭岩洞
環島必經，係一個洞口，無咩位泊車，由石頭望出去洞口係一個特別嘅景色，睇返另一邊，都可以望到蘭嶼嘅山，都算一個唔錯嘅地方，日落嗰時太陽穿過洞口，應該會有超多人黎影
五孔洞
順住過去就係朗島部落嘅五孔洞，洞入面有少少陰深，仲有好多天然滴水，涼浸浸咁，門口個牌仲話係達悟族嘅禁地，入面有十字架又有石堆，上網睇仲有啲鬼故添！個洞有啲陰森，所以唔敢喺入面影相。門口有小賣車，但係都太貴啦～
又熱又曬，所以之後去左食冰同雞蛋糕，蘭嶼出名係芋頭，真係幾好食，間冰店叫芋頭冰，我地無特登搵啲名店！雞蛋糕就有啲貴，但都好新鮮即刻整。
雙獅岩
位於海邊嘅好大兩舊石，兩個石嘅中間就係東清和朗島兩個部落之間的分界線，由路邊可以行落去，幾好玩，風景又靚，仲係一個好受歡迎嘅釣魚點，夜晚都可以喺依度觀星，因為離燈光好遠，不過因為去嘅時候差唔多月圓，月亮太星所以睇唔到好多星星！
東清
之後就一直去到東清貝殼砂灘，我地早上潛水嘅附近，不知名嘅一個地邊隨便停車，對出望到好多山同石，啲山形好獨特
東清灣
之後就係東清灣，可以影下傳統船，如果想坐上去，TWD500一次，要留意如果無得到批准千祈唔好掂架船，我地都係離遠睇下就算～
ONONTHEROAD 