Taiwan 台灣 | 我哋終於去左蘭嶼！交通、海盜船！

由第一次去台灣，就已經想去蘭嶼睇雨，但因為種種原因，都無去成，有一次係訂左飛機但太大風所以取消左，有一次係去之前話唔租車比香港人，所以又無去到，今次！同台灣朋友一齊去，終於去成左！蘭嶼係台東比綠島仲要遠同埋原始嘅地方，嗰度無電動車，如果無機車牌，係唔會租到機車，而地方都比綠島大好多，所以無車嘅話只可以行路或者踩單車，而有一間潛水，有電動自行車，但要book定。而我地因為多人，所以租左架八人車，當然啦，唔會有機車咁方便，因為島中間有條路，而只建議機車揸，私家車同大車都會有啲危險。我地去左三日兩夜，由台東搭船，大約兩個鐘左右船程，去之前都聽講船會好搖，係一定會暈船浪，所以怕搭船可以食定暈船藥或者搭飛機，但飛機亦係好難訂。我地非常好彩，唔算好大浪，睇Windy，啲浪大約一米高，有時啲浪可以去到三米！！！

我地搭台北去台東嘅火車，自強號 (3000)，3小時50分鐘，NT$936，去台東嘅火車仲可以見到龜山島。去到台東住一晚，第二日由富岡漁港搭去蘭嶼，除左富岡漁港，可以係後壁湖搭，聽講好似會近啲，但後壁湖太遠啦，去台東嘅火車仲可以見到龜山島。

台東火車站同台東市唔係同一個地方，車程十幾分鐘，火站附近無咩野睇，餐廳都唔係好多，去民宿附近見到好附釋伽田，依度買釋伽通常都到200台幣一盒。

第二日食完野就去碼頭，因為要早一個鐘去攞票，我地喺Klook訂票，NT$ 2,138，仲可以搵下有無優惠碼，如果直接船公司訂就係$2300，我地揀金星船務，其實都無咩野揀，去到個大廳好多人，大部分人都係去綠島，佢地架船走左之後得返好少人，拎完票飲啲野差唔多夠鐘，而登船口唔喺大廳依邊，要行一小段路。一日有兩班船，7點同12點半，為左唔好咁辛苦，我地搭12點半嘅船。去程嘅船有啲小。。。如果怕暈船，記得早啲去搵船後面嘅位。

我覺得依程船係算可以接受嘅浪，係臨見到個島，先真係好大浪，係海盜拋咁款，但只有十五分鐘左右，可以接受嘅。

蘭嶼碼頭唔係好大，通常租車就會直接喺度攞車，之後揸去民宿，我上網睇，好多都要你自己揸車去，而我地住嘅係藍海屋，其實幾大又幾靚，離碼頭十五分鐘車程，佢本身係潛水嘅但係有新聞出左，所以我地都無跟佢地潛。租車我地同星樂租，8人車NT$2800，係一架超舊嘅車，感覺揸揸下會散咁，不過黎到咁遠，都好難搵到好好嘅車比你，將就一下，行到就得啦！碼頭附近仲有好多放養嘅羊。