我地終於去澎湖喇！因為台灣本島好多地方都去左，今次搞搞新意思，去外島，我地只係留五晚係台灣，留三日兩夜係澎湖，所以到台第二日就要搭船過去，本身如果搭飛機可以由松山機場直接飛去就會慳返好多時間，但係我地太遲訂啦，只有唔靚時間既飛機，所以唯有搭船喇，我地都唔想搭太耐船，就係嘉義搭船去，搭船加高鐵同搭飛機差唔多價錢，但係就可以中午就到達澎湖。下次一定要早啲訂機票，就會無咁頻撲。
嘉義布袋港
前一晚同完朋友食飯之後就搭9點幾既高鐵落嘉義，其實搭船依個方法真係浪費左好多時間，到左高鐵站之後就坐左半個鐘既的士去酒店，其實由高鐵站去布袋港時間短啲，但係附近都搵唔到住宿，咁唯有住係嘉義市，搭第二日十點既船，1000twd一個人，計埋高鐵1080twd，加埋只係平搭飛機少少，飛機大約1300twd一個人。我地搭海有航運既太吉之星，上網訂飛，搭船當日早一個鐘左右去拎飛，之後就等，碼頭離嘉義市都幾遠，由我地住既酒店Hotel Hi新民店大約45分鐘既的士，到左布袋港已經好多人，除左太吉之星，仲有其他船都係差唔多時間出發，價錢都係差唔多。我訂既時候其實想訂一架又快又大既船，點知訂左架最細既船，都係個句如果早少少安排就可以搭到百麗輪，船程一個鐘左右。
可以入閘個時我地好興奮，見到好多大船，點知行行行左好耐，行到最遠個架小船先係我地個架
依架就係百麗輪，新同埋大好多，但係我地唔係依架
澎湖馬公港
原味漁村小吃
到埗之後我地就衝左去食野，去左路邊一間幾多人既餐廳，第一時間緊係食生蠔啦，係150蚊一兜！差唔多有十隻！
一二三石頭人民宿
食完野我地就call民宿黎接我地啦，本身講好左到時打比佢，點知原來佢已經一早係碼頭等喇，打比佢既時候佢咁岩就係附近，知道左之後幾唔好意思呀。民宿唔係馬公市中心，揸車就5分鐘，行路就要20分鐘，所以都幾唔方便，附近無咩餐廳，得便利店同埋超市，但夜晚好安靜，間野好新同埋好乾靜，住得都舒服。民宿老闆好熱情，帶左我地去租車，同訂船河。喺依度一晚590港紙一間房，唔算貴，唯一一點係佢雙人房滿左，所以有一晚要住四人房，第二晚要換房，有少少麻煩。老板基本上包接送，走嗰日佢送我地去機場！車程大概15分鐘。
澎湖市內的士
我地淨係第一日租左架私家車，其他時間喺馬公都係步行同埋搭的士，依度的士係超少，無uber，便利店call唔到，除左call車之外，喺街上面截唔截到都係靠緣份，如果截到既話你就行運了，佢地好好人之外價錢都係一致，就算叫佢用咪錶，無論幾錢佢最終都係收一百，第一次叫佢用咪錶，貴過一百佢都淨係收一百，之後再搭，都係一百，我睇係公價！
澎湖租車
我地一早就決定要租車喇，本來打算四個人租兩架機車，300TWD/day，不過實在太熱太曬，係曬到會中暑嗰隻！所以決定舒服啲，租架私家車。由123木頭人帶我地去佢相熟既租車公司，齊心租車行，老板娘係越南人曾經喺香港做野所以識講廣東話，酷酷的，我地租了Toyota Altis一日，1600一日，1000就半日但5點就要還車，喺度租車非常容易，唔洗買保險，唔限邊個揸，check車無咁嚴，因為我地發現架車都幾花，因為第二日一早就要出去，所以將架車泊喺民宿，擺低條匙，佢地第二日黎收（定唔知係咪民宿老闆幫我地還）。雖然老板娘酷酷的但還是有循例簡單介紹一下交通狀況、要注意的事，佢好強調唔好超速同周街泊。今次係老豆揸，台灣交通係左軚，同美國一樣（佢後生喺美國揸過左軚），始終交通方向同香港唔同，所以都係慢慢揸，好多地方基本上無乜車，條路好大，未揸過左軚問題都不太大。
ONONTHEROAD 