一月嘅時候，去左中國美術學院學畫畫，順便沿途玩左一下，全程搭高鐵。香港/深圳有一條線會經過哂景德鎮、黃山、杭州、上海，我覺得幾方便，而且啲高鐵站都唔太多人，不過回程一次過可搭差唔多七個鐘，所以感覺有少少耐，如果早plan好，可以考慮下喺杭州或者上海飛返黎。
第一站：深圳北 – 景德鎮 4h25m，三日兩夜，抱住有少少期望咁去，果然係有啲失望，如果係去整陶瓷或者時間特別多，可以去望下，但如果無特別興趣，可以唔去，而且去兩日一夜應該夠喇，去陶瓷博物館睇，成個地方都係陶瓷，除左陶溪村，其他地方賣嘅野都可以喺陶寶買到。
第二站：景德鎮 – 黃山 47mins，四日三夜，係今次旅行嘅重點！本身係打算去三日，不過住嘅民宿太舒服，加上因為全程係步行上山無搭纜車，所以喺度住多一日，嗰一日係咩都無做全程休息！！黃山喺一月唔係旺季，雖然有兩個主要景點都無開，不過有機會見到雪松，今次岩岩錯過左，但我都覺得好值得一去，係真係幾靚！
第三站：黃山 – 上海 2h46m，五日四夜，覺得四日就夠喇，同香港有啲似，都係商業化又好多人嘅地方
第四站：上海 – 杭州 45m，杭州市五日四夜，幾鍾意依個地方，旅遊區得黎唔會太多人，景色都唔錯，又有美術館，幾發達嘅地方，野食都幾好食，學校喺象山校區，嗰度比較民居嘅地方，而且感覺都好安全，啲人好樸素好nice！有一次仲落左成日雪！
第五站，杭州美院，分左幾個校區，有一個南山校區比較近西湖嗰度，今次要去象山校區，好離市中心好遠，都無咩娛樂，可以專心畫畫，哈哈，附近都係比較靜，都無咩大商場，不過有啲靚嘅餐廳，喺度enjoy左兩星期
回家！喺杭州直接搭7個鐘嘅高鐵，撞正就黎春運差啲買唔到飛，因為啲班次如果返深圳過關會好趕，所以直接搭去西九龍，五分鐘過關出到黎，好方便！！雖然國內各方面都好正，不過都好想家，出左黎差唔多成個月，下次應該要安排左上堂先，之後先去玩！！搭回程高鐵唔好彩嘅係無地方擺行李，好彩嘅係，有好多個站，隔離位都無人，哈哈，搭到去尾二個站先有人！
ONONTHEROAD 