由Ullapool上去北邊，我地住喺一間喺Rhiconich附近Oldshoremore嘅屋，附近嘅景點有 Oldshoremore Beach，比較荒蕪嘅地方，因為喺Applecross或者Ullapool已經無咩住宿，但如果直接去Durness住又太遠，唯有住喺當時最後既選擇，喺度留左三日兩夜，呢度比較本地人住既地方，人煙稀少好舒服，但要注意既係去到依個位已經無超市同好大型既商店，所以我地喺Ullapool去左Tesco Superstore入左貨先去，買定三日既食物，同埋喺Ullapool唯一一間油站入埋油，無記錯油價係$145左右，但北上之後啲油都唔係話貴得離譜，所以唔洗擔心會入唔到油，只係留意返上面既油站同埋商店既營業時間，好多都好早收。
三日兩夜既行程，第一日去到已經有啲晏啦，揸左一日車，我地第二日就去左Durness，其實Rhiconich附近都有啲野睇，後尾諗返好彩住左兩日，如果唔係要一日去哂Smoo Cave, Dunnet呢啲地方，一定會好攰。去到NC500嘅呢一個位，啲路開始係單程路，但唔洗擔心，有好多避車處，大家互讓好有禮。由Oldshoremore去Durness大約45分鐘，Rhiconich去就30分鐘，但其實可能有差不多一個鐘，因為無可能全程山路都係揸60mph嘛，揸到4-50已經好快啦，又要讓車，如果遇到假日就要再預多啲時間啦，因為好多caravan，所以我自己既感想係唔好一日set太多個點，又唔洗話一定要去哂bookmark左既點，取捨一下其實都唔緊要。
Oldshoremore – Munro House 係喺airbnb搵嘅屋，好大又好乾淨，門口仲有好多位泊車，仲有bbq既地方，只係奇怪咁大風又咁凍點樣燒野食啊。。去到北部，超凍超大風，但係已經係八月。依度好舒服，夜晚無乜光，但我地去既時候天氣麻麻，如果好天應該會見到好多星星
Inchard Badcall viewpoint – 一個高處望落個湖既景點，就係去到可以影下相，會見到好多Lams Slow, passing place嘅牌子，呢幾日喺北部，通常早上都係灰濛濛，下午就會好天
Cocoa Mountain – 佢話係The Best Hot Chocolate，去到Durness，我覺得不仿一去嘅，天寒地凍飲杯熱朱古力一啲都唔過份，而且價錢都好合理，同喺香港唔差好多，唔算好overprice，朱古力真係好飲嘅，但就好甜，我就飲左mocha，都好好飲。最正嘅係唔多人，好舒服，又唔洗等位，又有得泊車，間店位於既地方有啲賣藝術品既店，又有啲gallery，而去Smoo Cave都係十分鐘內嘅路程。
Balnakeil Church – 飲完朱古力之後去左兩分鐘車程既地方，係一個可以望落去Balnakeil Beach既教堂，前面都有得泊車但唔多位，十幾個左右。以前呢度係一個教堂，宜家得返個外殼，同埋出面既墳墓，係一個免費嘅景點。望落去個沙灘有人喺度衝浪，真係好大浪，呢度好多沙灘，但大浪到唔會敢落水！
Smoo Cave – 之前喺YouTube睇片，覺得都唔一定要去，但去完又覺得依度幾好喎，有停車場同廁所，步行徑都建設得好好，除左睇個洞，仲可以去山邊睇個海，有幾宏偉嘅感覺。當日有少少落雨，但景色都好靚，依度出名既係洞入面有個瀑布。沿住條路行落去就去到個洞，然後行返上山就可以睇到個海，我覺得可以預一個兩鐘比依一個景點。
ONONTHEROAD 