Taiwan 台灣 | 從廈門去金門 | 廈門南普陀寺

自從上年去完台灣，就無去過旅行，今次選擇去金門係因為呢個地方既特別，離台灣本島有啲遠，反而喺中國呢邊過去會近啲，我地由廈門過去。首先要準備回鄉証，香港人去金門同入境台灣本島一樣，都只係要用入台證，喺出發前買好哂高鐵飛同船飛，我喺trip.com買既。因為太遲買高鐵飛，所以時間唔係好靚，去程淨係買到差唔多四點出發既一等座，貴少少但確實係舒服啲既，一張飛計埋手續費大約HKD400左右。當日喺香港出發，因為落雨所以過左深圳之後搭地鐵去深圳北，時間同搭的士差唔多。

經過今次既體驗，我下次會選擇由西九龍直接出發，因為深圳北太多人喇，成個過程同環境都好令人緊張，個站喺開車前兩個鐘可以入去，宜家車票都係電子化，不過喺深圳北就要行人工通道，喺買票既時候記得一定要check清楚回鄉証既資料係正確，打錯左就好麻煩喇。基本上唔洗實體票。成個過程令人緊張既位係開車前十分鐘先放人入去，一個閘口又有機會有兩班車，架車咁多人就係用嗰十分鐘去入閘，太悠閑既話就會好有機會趕唔切喇。

搭完一等座，絕對會唔想搭返二等座，一等座少啲人又會安靜同乾淨啲，而我建議搭車既時候都要著長褲。由深圳北去廈門要三個鐘五十幾分鐘，有啲車就三個半鐘左右，而呢一日既車因為天氣關係所以晚點左一個鐘。

除左一等座舒服，仲有商務位可以揀

去到廈門，我地住海景千禧酒店，地理位置都唔錯，幾岩我地停一停，第二日去附近行下，夜晚去到都可以喺中山路步行街搵啲野食下

中山路步行街係遊客景點，好似一個夜市咁，如果有時間係可以行好耐既，我地求其去左間food court食啲野就算喇，都係食沙茶面嗰啲，喺廈門既咁短時間都無用過現金！都係用支付寶或者微信。雖然都係有啲地方用唔到，有少少唔方便。

第二日因為搭兩點既船，所以朝早都有啲時間睇下野，食左個杭州小籠包就出發，搭的士去南普陀寺，係廈門好出名既一個寺。但係又係要喺微信登記，因為要用電話號碼所以我地登記唔到，不過比證件佢睇佢就放行喇，入口同出口都分兩邊，我見到啲大媽就咁係出口爆入去都得啵。南普陀寺係免費入場，行左一陣之後就要出發寺碼頭喇

廈門出發既碼頭係五通碼頭，去程船飛HKD200，都係喺trip.com買，但我知道klook會平少少，但係有啲唔明佢要入既資料，所以選擇喺trip.com買，買完早少少去攞票，攞票既時候要準備好回鄉証、護照同入台證。喺下面counter攞票，同機場有少少似，都係兩個鐘前可以攞票，我地兩點既船，差唔多1點20分先可以過關，1點40分先可以上船。