阿里山本來就唔係喺今次嘅計畫入面要去既地方，但因為無到去蘭嶼而有多出既時間，所以決定再去阿里山，台灣有好多類似既景點，好似清境咁，其實清境都好玩，但就唔知點解對阿里山情有獨鍾，數下手指今次應該係第五次去啦，我地試過用唔同既方法去，小火車、巴士都試過，今次因為係臨時決定要去，所以無預先book到小火車，其實搭火車同巴士既時間都係差唔多，但小火車感覺會比較有特色，所以如果想體驗多啲，就要預先訂定飛，而且小火車都唔係成日上到頂。
今次我地前一晚喺嘉義住，第二朝就搭巴士，前一晚喺便利店買定左台灣好行阿里山線嘅車票，因為搭火車所以住都係喺火車站附近（高鐵站比較遠），所以揀左搭阿里山線-B線(臺鐵出發)部分班次經奮起湖，一張飛都係NTD251，超抵呀，而且有好多班次，我地揀左9:40既車，12:40就到阿里山轉運站，中間喺奮起湖有一個小休息，而小火車每日只有一班，嗰時只係行駛到十字路，所以搭小火車就要留意啦。
巴士都唔算辛苦，而且景色都好唔錯，多年無黎，發現好多野都唔同左，好似變成左一個景區，入去要收入山費NTD300，入山前有個轉運站，前面有個便利店，隔離有個大閘，要比左入場費先入得，而且好多民宿都無左，即係話少左好多住宿既選擇，以前一落車就好多人同你推介民宿，宜家無哂，得返啲高級賓館，當下見到得返幾間，唯有逐間打電話，我地五個人，好多都full左啦，得返一間叫文山賓館，NTD4400一晚既四人房，佢地都比我地屈蛇，只不過一個人要訓地下，一晚半晚唔緊要啦。
安頓好之後就去食午餐，跟住就去行下山，山上面都係食小菜為主，或者打邊爐，我仲飲左咖啡～
食飽之後就開始行啦，因為無搭小火車上黎，所以我哋去搭神木線，都係紅色小火車，當係行少啲又可以過下癮。當然唔搭既話都可以係行山入口見到架車。如果第二日想去睇日出都係由呢度搭祝山線去睇。我地係去行巨木群步道，但搭車直接去神木車站開始，差唔多行兩小時，唔算好辛苦。
阿里山第一代神木就係位於依個神木站，樹齡有3000年！喺1997年倒塌，雖然倒到，但依然睇到佢既壯觀，每次呢一個點都係必經之路，由依度開始，再行去睇第二代、三代木。
大到相機都影唔哂既樹幹
阿里山猴子
去到受鎮宮就係一個休息點，嗰時裝修緊外面，但都可以入去參觀，側邊都有啲檔仔，食少少野再出發
ONONTHEROAD 