之前講過依一次去台灣嘅重點係蘭嶼，但係因為去之前幾日打電話去租車，佢地似乎唔想租車比香港人，因為「意外太多」，而蘭嶼都無電動車可以租（電動車同機車唔同，係類似機車但唔係機車，速度都無咁快，貴少少但感覺安全點，之前去綠島都租過！），所以臨時轉軚，雖然訂咗住宿同船票，不過唔緊要啦，計畫趕不上變化嘛！由恆春出發去小琉球，好彩恆春去東港都唔係好遠，計埋塞車一個鐘左右！包左車去東港搭船 TWD2000，推介大家如果有時間可以留一晚！有台灣最平最新鮮（好似係）嘅魚市場。 由東港去小琉球有好多船班，因為有幾間公司，我覺得搭邊一間都無所謂，你去到幾點就搭邊班就會最邊便，喺碼頭有啲阿婆會向你兜售船飛，我地就搭左泰富輪船TWD230來回，20-30分鐘就到喇，好適合會暈船嘅人。
由恆春包車去東港嘅途中
東港碼頭上船中，隻船唔係好大，分室內位同室外擺行里位，可以行出船尾吹風，感覺有啲似新渡輪，幾舒服唔算好大浪，整體都無見到有人暈船，因為你想暈嗰時已經到左。暑假嘅小琉球好好天，無乜雲，曬死但係好靚！感覺旅遊區一點，但啲人都好好，感覺良好！！！
落船之後就即刻搵住嘅地方，好耐無試過即刻搵！行左唔係好遠，搵到一間叫柏琉民宿TWD2800一間房，喺碼頭行十分鐘左右，屋主都好好人，係家庭式嘅一間民宿。佢仲幫手車人車行李過去。安頓好之後順便叫佢介紹租車，駿昇車業，電動車TWD500/24小時，隨時返去換電，佢地都好好人
租左車係附近隨便食啲野就出發環島啦，喺依度揸車唔算難，基本上無乜交通燈，只有碼頭附近有幾盞，慢慢揸就唔會好危險啦！
花瓶岩，第一站就係可以落水玩，附近有間廟，其實一路既景點都係圍住個島行，跟住指示就會去到，有啲地方有門票，因為太熱既關係，有啲景點都無行落去，我地喺白沙尾漁港開始向北走：花瓶岩 -> 美人洞 -> 望海亭 -> 中間有好多景點 -> 落日亭等等。我最鐘意既一個點就係落日亭，係去左幾個景點之後既休息之處，我地除左下午去，一定要係日落嗰時去！好靚，個海好大！
風馳電掣
美人洞
台灣本島
ONONTHEROAD 