浸海參

喺上年，屋企出現左1kg既澳洲海參，無寫住係咩品種但應該係普通禿參，大約有食指咁大條，趁住新年試下啦，今次試十條，衰左唔係太肉赤嘛。最後發得都幾成功，變左幾倍大。其實步驟都好簡單，都係每日換水，上網睇就話每12個鐘換一次水，但邊有咁得閒呀，冬天既話我覺得換一次都ok。

Step 1: 準備好一大個容器，因為海參要好多空間發大所以個容器一定唔可以細

Step 2: 所有掂到海參既野都唔可以有油，包括對手，如果有油就會發唔起

Step 3: 用水沖一沖啲海參，再用牙刷刷一刷，因為海參表面會有窿，所以可刷下

Step 4: 開一大煲水浸，每日換兩次水，浸兩日

Step 5: 浸左兩日之後應該就開始軟，但唔係條條都係一樣既軟度，所以唔一定浸兩日，有幾會係3-4日，我既理解係浸到用刀好輕力就可以切開就ok啦，沿住白色位切開，兩日之後應該會發大左少少，切開左之後洗乾淨入面，一條條既係海參腸，都係可以食，仲有豐富營養，呢個step都係為左洗乾淨入面，唔洗夾硬洗，一切開會見到好多沙，洗乾淨哂就可以去下一步

Step 6: 洗完之後就可以再浸一日水，都係keep住每日換兩次（如果有時間）

Step 7: 開一大煲水，一開始開一大煲水，滾起轉細火煲佢半個鐘，煲緊至煲完之後都唔好打開蓋，一直到第二日，目的係用熱力去焗去，呢一個step之後，第二日就會發現佢大左勁多

Step 8: 依日之後就係每日換水同摸佢地，睇下邊條已經得，因為焗完一日之後，可能會有一兩條已經差唔多得，只要摸落去係林林地，特別係個背部黑色部份，如果仲有少少硬就姐係未得，所以每一條都有可能係唔同時間發好

其實係打依篇文既時候都唔係全部已經發好，所以發海參唔係話好麻煩，只要每日去關心下佢就可以發到啦，時間可以一星期就得，但好多時都可兩星期，如果想係某一日食，一定可預多啲時間，發好左可以擺喺冰格就得。

搞掂哂之黎，年三十拎左黎炆冬菇海參鵝掌！！！！