Mount Fuji | 登富士山 | 富士宮線 | 五合目至八合目

10 July 2018 

經過完開山儀式之後，繼續坐巴士去登山口，到左五合目都已經十一點幾，去完廁所就急不及待要上山(山上面既廁所要100yen，同埋無水洗水的)，因為當時訂左頂上富士館，六點前就要到達check in，一泊一食就6500yen。

我地既物資都算帶得足，最緊要係帶衫、藥同埋氧氣，因為上到山頂又凍又大風，加上海拔高，所以一定要夠暖，食物個d唔帶咁多其實都可以，雖然越高越貴，如果你有錢，其實都可以係山上面買，不過山下幾百yen一支氧氣，可能係山上面就要1200yen。

因為今次媽媽都一齊行，所以我地揀左富士宮線，因為佢係咁多條線入面最短，聽講都無吉田線咁多人去，而且當時吉田線係最早開山應該有好多人去個邊行(好似係7月1號開)，原路上原路落，可以坐車到2400m先開始行，係咁多條線入面最高，同山頂標高差1300m，距離有5km，係依邊行去山頂劍峰都係最近的，不過落差比較大，要多少少氣力。

日本人好鍾意將山分為十個合目，但每個合目距離又唔係一樣的，所以有時要行得耐啲，有時又好快到左，富士宮分為五合目、六合目、新七合目、元祖七合目、八合目、九合目、九合五勺同埋山頂，當中元祖七合目係舊既合目，九合五勺係九合目同山頂中間既一站，英文係9.5 station。

巴士站 廁所

      

五合目2400m

由五合目到六合目既路程都唔算太辛苦，都係一啲小斜路，有少少散步既感覺，當係熱下身，我同樂好快就行左上六合目等佢地，估唔到媽都行得好快，但靖開始有少少高山症既先兆，有啲透唔到氣。順便講一講今次既天氣，我地超級好彩，行既前同後一日都係差既天氣，差唔多日日都陰天，只係得登山日係好天，出太陽同藍天白雲，啲雲黎得快去得快。

      

      

      

      

六合目 2493m

由五合目行上去都唔算太辛苦，沿途見到中學生落山，佢地跳跳紮，好似一啲都唔辛苦咁。係六合目既雲海莊燒了第一個印，燒印每次200yen。路上都有綠色，主要都係碎石路，六合目到新七合目主要都係大斜坡。

      

      

新七合目 2780m

上到黎越黎越多雲，我諗我地入左去啲雲入面，靖同媽開始行得越黎越慢，我同樂好快就上到去了，老豆就係尾度睇住靖，媽開始想係度住，叫我地自己行。我已經開始擔心，因為我訂了山碰既山屋。

元祖七合目 3010m

去到3000m以上，媽同靖已經非常辛苦，開始行兩步就要停一停，到左山口山莊，好多人都係度休息緊，天氣凍左好多，大霧，濕氣好重，雲移動既速度好快，我地係山屋等靖佢地，等等下，個藍天又出左黎了，而啲路越黎越沙同泥。已經到左既我同樂，見佢地行得咁辛苦，只好落去幫佢地拎袋。

      

     

      

      

竟然係3000m以上見到有雀仔

      

八合目 3250m

去到八合目，差不多4點，靖同媽已經不能再前進了，即刻就send了email同上面山屋講我地去唔到，只好住係池田館，一泊一食 6000yen，洗手間免費，晚餐6點開始有咖哩汁飯，無咩胃口，水都限則，一張枱坐了八個人但得一煲茶，要等全部人坐好先可以食，感覺麻麻地，去之前聽講過萬年雪山莊既食物係最好食的。對池田館既感覺真心麻麻，好似做每一樣野，連嘔都唔比，要你忍住即刻仆出去嘔。見我地有人唔舒服好似得罪左佢咁。。。

      

上到去池田館，開始又再好天，我地企左係雲上面！好早就有雲海睇。。。

      

天氣轉得太快，去完個廁所，出到後個天就會灰哂，所以見到好天，唔可以話等一陣，要即刻出去，因為唔會知幾時會好天，

      

開始入黑，因為未咁早訓得著，所以我地去左池田館後一個大鳥居，不過太大霧都睇唔到啲咩。

      

      

仲差兩步就到達同吸緊氧氣既靖

      

池田館內部

食完飯，大家開始訓覺，好似係八點鐘關燈，九點幾十點有兩個香港後生男到達，但佢地一到，就不斷係度係咁講野，忍唔住叫佢地細聲啲講野。成晚其實無咩點訓，可能係一點幾就要起身攻頂太抗奮。