留左係感覺上無咩野做既濱松三日，都發掘左唔少景點，除左食鰻魚，都有幾個值得睇下既地方，老實講都唔算好遊客區，一個小城市咁，人又唔多都幾舒服，我地搵左一日去濱名湖同弁天島，本來以為依兩個地方係互通，不過原來都係要返去濱松站搭車，所以去完湖就返左去搭車去弁天島，感覺有啲蠢，我推介早少少出門口，濱名湖+花公園一齊去，條路會順啲因為花公園同湖係搭同一架車，相隔只係幾個站。
Hamamatsu Lake 濱名湖
由我地第一日去名古屋開始，就著足幾日雨，去到濱松天色都唔靚，都係陰天，問左下人原來我地去既季節係叫綿雨季，日落夜落，所以係濱名湖都無好靚既景色，同日月潭有啲似（果然係姐妹潭）。首先去左館山寺溫泉借左個廁所，之後就上左山，係一小段山路，有少少似象上，上到去除左有個寺仲有啲小徑，幾多樹好涼咁。
館山寺
去完館山寺就去左食飯，之後就搭纜車去大草山，依幾個地方都好近，唔洗搭車。其實睇既景色都差不多，山上面唔係好多野睇，有個觀景台，有個好少既範圍行下咁。
Bentenjima 弁天島
其實去完濱名湖最好就係去埋花公園，因為真係好近，但我地出發得遲左，所以就去弁天島啦，由濱松站搭車過去都係十幾分鐘，到埗後行少少就會到湖上鳥居，我地有期待日落，不過天陰陰，兩次去水上鳥居都係陰天。
其實佢都係屬於濱名湖既範圍入面，但係依個位就係連住個海，睇到有日落既相個太陽會咁岩係個鳥居個度落，其實個野都幾遠，後面仲有條高速公路。好似話可以係度摸蜆的！！！
之後向左行就會去到一個港口，好多漁船民居等等。。。泊船個位仲有好多殼，生蠔扇貝等等。。。
ONONTHEROAD 