Pena Palace 比一個公園包圍住，搭巴士到達入口買左飛再要行少少山先到個宮，因為佢座落係個山頂上面，係依邊既入口可以直接買埋其他景點既門票，依度我地順便買埋摩爾人城堡，Pena Palace 可以揀淨係入 Park 唔入 Palace，其實淨係入Park €7.5 已經好多野睇，可以去宮既外圍，不過難得黎到，比多少少睇下入面 €14。摩爾人城堡就 €8，都幾好睇，如果有更多時間就仲好，可以慢慢行。
去到Sintra之後搭火車站出面既434號巴士，Sintra之旅其實就係不斷行山，最好著波鞋同行山裝黎。見到個宮之前都係一啲好大既樹同斜坡，雖然好熱但有樹遮下蔭都無里斯本40度咁熱。
忍唔住係等巴士既時候買左頂帽，好似要€5定€7，買完之後覺得其實有啲貴，因為太薄都唔係好遮到太陽，最後依頂帽留左係巴塞。
就算望到個宮，都仲要爬坡上去，遠睇好似卡通入面既城堡，感覺仲係好新潮，近睇藍色個間係用傳統葡式磚舖面。
因為可以行埋入去影相，所以感覺好似迪士尼或者主題公園，只係佢真係城堡同埋有皇室住過。
行到咁上下有個平台超級大風，可以望返過去Sintra鎮同其他景點，最遠處係個海。
室內雖然無冷氣但都好涼爽，都係啲皇室野同埋好大既廚房，好靚既廚具等等。
ONONTHEROAD 